Afapo tamin’ny vokatra ireo mpikarakara ny fifampiarahabàna tratry ny Taona teo amin’ireo Malagasy any Düsseldorf sy ny manodidina. Izany dia natao ny 12 janoary tao amin’ny Herz-Jesu-Kloster, izay isaorana be dia be ireo Masera nampiantrano tamim-pitiavana.

Taorian’ny Lamesa tamin’ny teny malagasy izay notarihin’i Mompera Raymond Rambatoson SJ, dia nifampizaràna ny sakafo izay nentin’ny tsirairay, narahina koràna sy dihy, izay natrehin-dRamatoa Mpiandraikidraharaha Mpisolo toerana avy amin’ny Masoivoho, Rafaramalala Florence Isabelle, sy ny Konsily eo an-toerana Andriamatoa Lutz Pollman.

Maro ireo Tanora sy ireo efa manana traikefa no tonga, faly nifanakalo hevitra sy niara-nikoràna, samy nitondra sakafo, vatsy niraisana, izay ampy tsara nanana amby.

Taorian’izany ihany koa no nampitàna ny fanasàna ho an’ireo Malagasy sy ny namana rehetra amin’ny fankalazàna ny faha-25 taona naha-Pretra an’i Mompera Rambatoson, any Frankfurt – Sankt Georgen ny Alahady 03 may amin’ny 11ora15mn.

Mamerina hatrany ny firariantsoa, fahombiazana, fanambinana sy fifanomezan-tanana amin’izao Taona vaovao 2020 izao ny mpiara-miasa rehetra eto amin’ny Masoivoho.